A Xunta destinará un total de 129.893,50 euros á eliminación de especies exóticas invasoras nas illas Cíes, Ons e Sálvora do Parque Nacional das Illas Atlánticas de Galicia.
O contrato para a execución destes traballos, que acaban de adxudicarse e están previstos para os próximos 33 meses, enmárcanse no chamado LIFE Insular, un proxecto transnacional co-financiado con fondos europeos no que participan España e Irlanda e que busca acadar a restauración integrada de hábitats insulares do Atlántico. As actuacións centraranse nas dunas grises fixas e no seu hábitat de contacto para “garantir que manteñan un estado de conservación favorábel”. Para lograr estes obxectivos, a iniciativa prevé executar sobre o terreo unha serie de medidas centradas nos tipos de hábitats insulares 2130 e 4030, correspondentes ás dunas costeiras con vexetación herbácea e aos queirogais secos europeos (brezais).
A Consellería de Medio Ambiente informou que este novo contrato “permitirá darlle continuidade aos labores iniciados en 2022 e acometidos tamén durante o ano pasado nos arquipélagos de Cíes, Ons e Sálvora sobre a flora terrestre exótica invasora (acacias, margarida africana, etc.) e que inciden de forma moi beneficiosa no estado de conservación dos hábitats antes mencionados”. Así, de aquí a novembro do ano 2026, a adxudicataria terá que ocuparse da realización de accións para a mellora da estrutura e da funcionalidade dos tipos de hábitats propios destas illas a través da eliminación e control de flora invasora, mediante a aplicación de métodos manuais.
Illas máis resilientes fronte ao cambio climático
Medio Ambiente recorda que o obxectivo principal do proxecto LIFE Insular é promover un estado de conservación favorábel dos hábitats de illas pertencentes á Rede Natura 2000 e localizadas no Atlántico, ao tempo que se aumenta a súa resiliencia como medida de adaptación fronte ao cambio climático. Deste xeito, búscase minimizar a medio e longo prazo o impacto que poden causar as posíbeis perturbacións externas sobre as zonas de actuación e avanzar cara “a unha recuperación da paisaxe natural destas illas co reto de reverter a situación á que había 70 anos atrás”.
En concreto, o LIFE Insular pon o foco de atención sobre oito Zonas de Especial Conservación (ZEC) localizadas en cinco illas que son —ademais das tres galegas xa citadas— La Graciosa, en Canarias, e Irlanda.
A Universidade de Santiago de Compostela actúa como coordinadora do proxecto, mentres que o Goberno galego, a través da Vicepresidencia Segunda e Consellería de Medio Ambiente, Territorio e Vivenda, se encarga da execución técnica, tal e como se recolle no convenio asinado no ano 2022 entre ambos organismos. Os outros socios participantes son o Organismo Autónomo de Parques Nacionais, por parte española, e o Department of Housing, Local Government and Heritage e o Coillte CGA, pola irlandesa.
