As chamas arrasaron con todo o que se gardaba no interior, incluída unha moto e unha cociña de gas
Ardeu o pendello e todo o que había no seu interior, unha moto, maquinaria agrícola, unha cociña e outros materiais que se almacenaban no alpendre.
Sucedía sobre as 15:30 horas. Foi o mesmo dono quen avisou ao 112 Galicia de que lle estaba ardendo o garaxe da casa, situado en O Corral de Abaixo, en Camboño. Aseguraba que non había persoas afectadas.
Acudiron os Bombeiros de Boiro, que comunicaron que o lume xa fora controlado polos veciños, polo que, os Bombeiros remataron a extinción e removeron rescaldos para asegurarse de que quedaba todo apagado.
Aínda que finalmente non chegaron a intervir, desde o 112 Galicia informouse aos Bombeiros de Ribeira e aos membros do GES de Noia, así como, tamén foron informados a Garda Civil e os efectivos da Agrupación de Voluntarios de Protección Civil da localidade.
