O Concello de Ribeira celebrou este sábado 13 de xaneiro, en colaboración coa organización Greenpeace, unha xornada de limpeza de aglomerados (pélets) de microplásticos. A xeira de traballo desenvolveuse entre as 10:00 e as 13:·30h por ser “horas de baixamar”. Esta xornada de traballo estivo coordinada por membros do Grupo Municipal de Emerxencia (GAEM) de Ribeira e por profesionais ambientais.
Segundo informou o Concello, máis dun centenar de persoas acudiron á praia de Balieiros, en Corrubedo, para axudar na limpeza organizada polo Concello xunto á organización ecoloxista Greenpeace. O Concello agradeceu a axuda de “tódalas persoas voluntarias que viñeron a botar unha man a pesar do mal tempo, ao GAEM, a Pepe de Adelino pola doazón das peneiras para a limpeza e a Greenpeace pola súa colaboración”.
O alcalde de Ribeira, Luís Pérez, explicou previamente á celebración da xornada que “malia que non ser unha competencia dos Concellos a realización deste tipo de limpezas de verteduras contaminantes”, dende o “Goberno local non podemos mirar para outro lado mentres millóns de bólas de plástico chegan á costa ribeirense” e declarou: “Poñémonos á fronte sendo a primeira Administración en actuar para atallar esta crise ambiental”.
