UFD, a distribuidora eléctrica de Naturgy, comezou o ano achegando datos sobre os traballos desenvolvidos na nosa comarca para optimizar o servizo á cidadanía. No que se refire ao concello de Rianxo, investiu preto de 520.000 euros en varias actuacións e obras de mellora de instalacións eléctricas no municipio de Rianxo (A Coruña). A compañía construíu unha nova liña de media tensión subterránea de 600 metros no lugar de Abuín, con orixe nun novo apoio onde se instalou un interruptor telecontrolado, e final nun novo centro de transformación, con dúas liñas de saída en baixa tensión.
Así mesmo, a distribuidora construíu no lugar de O Pazo unha nova liña de media tensión aérea de 1.420 metros, para alimentar un novo centro de transformación con dúas saídas de baixa tensión.
A compañía inclúe cada ano no seu plan de investimentos actuacións e iniciativas para potenciar as infraestruturas de subministro de enerxía eléctrica e mellorar a rede de distribución eléctrica, especialmente en zonas rurais, contribuíndo así ao desenvolvemento económico destes territorios e á mellora das súas condicións de vida.
Para o delegado de UFD na provincia da Coruña, Emilio Castro, “o investimento realizado é unha proba máis do compromiso desta compañía co desenvolvemento enerxético de Rianxo, xa que as actuacións realizadas aumentarán a capacidade da rede de distribución do municipio, ademais de mellorar a fiabilidade da subministración eléctrica e minimizar os tempos de resposta ante calquera incidencia no municipio.”
UFD, distribuidora eléctrica de Naturgy, xestiona na provincia da Coruña máis de 23.000 quilómetros de rede de baixa e media tensión, preto de 10.300 centros de transformación e dá servizo a máis de 715.000 puntos de subministro. En Galicia, dá servizo a case 1,6 millóns de puntos de fornecemento eléctrico en 286 municipios das catro provincias galegas, a través dunha rede de 60.300 quilómetros de liñas de alto, media e baixa tensión.
A distribuidora investiu máis de 650 millóns de euros nos últimos cinco anos para mellorar o seu servizo e infraestruturas en Galicia.
