O Concello de Rianxo emitiu un aviso coas restricións de tráfico previstas para este venres 5 de xaneiro con motivo da Cabalgata de Reis.
As limitacións comezarán a partir das 16:00 h, intre no cal xa non estará permitido estacionar na rúa Rinlo nin na praza Castelao, así como tampouco nas inmediacións do Pavillón Municipal José Manuel Abuín “Chema”.
A comitiva sairá ás 15:00 h. da entrada ao núcleo da Bacariza (Isorna) na DP-3301. Dende aquí dirixirase a Rianxiño e través da DP-7201, da DP-7202 e da DP-7203 chegará ata Campo de Pazos. Seguindo a AC-305 dará a volta na Ponte Beluso e seguirá esta mesma estrada ata Burés, dende onde collerá cara o centro da vila a través da DP-7202. Nestas estradas produciranse puntualmente cortes de circulación ante o paso dos vehículos que compoñen a Cabalgata de Reis.
