Na xornada deste luns 29 de xaneiro, o secretario xeral de Política Lingüística, Valentín García, participaba na presentación do proxecto Divertímonos xogando coas nosas palabras, un xogo didáctico encamiñado ás primeiras etapas educativas co que a Consellería de Cultura e Educación reforzará a aprendizaxe da lectoescritura en lingua galega amais de favorecer a adquisición de vocabulario galego entre a cativada. Na cita fíxose saber que teremos toda a información e os recursos dispoñíbeis sobre este proxeto no Portal da Lingua.
“Trátase dun recurso innovador e motivador polo seu carácter lúdico e manipulativo a través do cal se reforza a aprendizaxe non só da escritura e da lectura, senón tamén do noso léxico”, salientou Valentín García, engadindo que “a transmisión interxeracional da lingua é fundamental nas primeiras etapas educativas e precisamente é aí onde centramos os nosos esforzos con proxectos como este, que se suman a grandes iniciativas como o programa de dinamización lingüística 21 días co galego e +, que este ano trasladamos por primeira vez á etapa infantil”.
Engadir que ao acto de presentación, que acolleu o CEE María Mariño da Coruña, tamén participaron a directora do centro, Mª Luz Barreiro, e as autoras do proxecto, as profesoras Eva Uceira e Rosa Mary González.
Indo ao proxecto, dicir que o profesorado poderá traballar, en grupo ou individualmente, a conciencia fonolóxica, un dos mellores compoñentes para a aprendizaxe da lectoescritura e para a adquisición de vocabulario implícito e explícito. O proxecto consta de dous xogos recollidos nunha pequena caixa de cartón cos que traballar, segundo se decida: a conciencia léxica, silábica ou fonémica. O primeiro deles consta de 175 tarxetas con fotos reais a cor coas que o profesorado poderá realizar até oito actividades diferentes. O segundo xogo, Descubre o intruso, está composto por 70 discos. Cada un deles consta, á súa vez, de cinco fotografías, das cales catro coinciden na
sílaba ou no son e outra non ten relación fonética coas anteriores. Neste caso, o alumnado terá que identificar en que coinciden as catro imaxes e indicar porqué o intruso non forma parte dese grupo silábico.
