Este sábado 27 de xaneiro toca bailar, latricar e degustar gastronomía no Local Náutico de Porto do Son, na explanada portuaria sonense. Estamos a falar da primeira edición do Encontro Musical Sonora, unha proposta cultural e social onde, segundo informa a organización (Sonora Asociación Cultural), a música, a leria e o bailoteo son protagonistas.
A vertente musical (artistas convidados) virá da man de Ally Bally, Rumbía e Puga & Dake. Ademais, haberá foliada libre. A cita dará comezo ás 20.00 horas. A vertente máis gastronómica poderana atopar os asistentes na cantina e nos petiscos que acompañarán o encontro Sonora. Organiza, como dixemos, a Asociación Cultural Sonora en colaboración co Concello de Porto do Son.
