O Museo do Gravado de Artes (Ribeira) organiza este mes de xaneiro a apertura dunha nova exposición, unha relevante mostra en homenaxe ao artista compostelán afincado na nosa comarca Veiras Manteiga. Será este venres, 12 de xaneiro de 2024, ás 20.00 h na Sala 1 do Museo do Gravado.
A exposición consta de 32 obras. Acompaña a exposición a edición dun libro para bibliófilos en edición limitada a 30 exemplares numerados da seguinte forma: 1 P.A.; 4 exemplares I/IV a IV/IV e 25 exemplares 1/25 ao 25/25, numerados e asinados polo artista. O libro está recollido nun estoxo e contén 32 láminas asinadas e numeradas por Xosé Luís Veiras Manteiga e autentificadas ante o notario José Prieto Luengo de Boiro.
Esta homenaxe súmase á celebrada en febreiro polo Concello de Ribeira, que expuxo no Consistorio 36 obras pictóricas do artista, baixo o título Obra recente. Contrastes.
Veiras Manteiga, Premio Barbantia á Traxectoria Cultural (edición 2023), reside na aldea de Camboño (Lousame), que é, nas súas palabras, a aldea onde hai máis artistas e creadores por metro cadrado do Barbanza.
