O alcalde de Porto do Son, Luis Oujo, avanzou novos detalles sobre o proxecto para crear na vila sonense un novo centro de saúde e sobre os vindeiros proxectos de saneamento, melloras nas estradas e posta a punto das aldeas.
Respecto do centro de saúde, o alcalde Luis Oujo confirmou que a alternativa definitiva é a posta en valor dun edificio en estrutura que no seu día ía ser destinado para vivendas e ao que se pretende agora dar unha nova vida, útil e integrada. Para a súa conversión en ambulatorio, solicitouse un préstamo sen intereses ao Instituto Galego de Vivenda e Solo (Consellería de Medio Ambiente) de 6 millóns 300.000 euros, préstamo que xa foi confirmado os días pasados pola Xunta. O Concello inclinouse por esta opción pola ampla superficie que achega o solar, e a súa dispoñibilidade para a veciñanza. Tamén, para avanzar nun dos obxectivos do equipo de Goberno: combater o feísmo a nivel local e reaproveitar o xa construído.
Respecto do saneamento, o rexedor informou de que se ben están pendentes actuacións na parroquia de Queiruga (actuacións que están a desenvolver Augas de Galicia e o Concello), o termo municipal ten case a totalidade do seu saneamento completado. No que atinxe ás melloras nos núcleos tradicionais, o Concello formalizou un novo acordo co IGVS para recuperar a accesibilidade, as infraestruturas, a seguridade e o impacto visual nas aldeas, traballos que pasa polo imprescindíbel acondicionamento do firme nas estradas e camiños (pavimentado), que será posíbel grazas (precisamente) á dotación de todos os servizos previos, recoñeceu o alcalde.
