O Concello de Porto do Son anunciou que vai licitar nas vindeiras semanas a redacción do proxecto do seu futuro polígono industrial, cuxo plan de ordenación xa figuraba nos orzamentos de 2023, cunha contía de 123.420 euros, e que no estudo de viabilidade inclúe unha superficie duns 70.000 metros cadrados na parroquia de Nebra (que permitan medrar e consolidarse a empresas instaladas en territorio sonense), actuando a Administración local como promotora e o Instituto Galego de Vivenda e Solo como principal colaborador deste inicio do proxecto.
Trátase, en palabras do rexedor Luis Oujo, dunha iniciativa necesaria que vén sendo demandada dende hai tempo polo sector produtivo local, que quere medrar e ao mesmo tempo desenvolver a súa actividade no propio concello. Estas empresas, sinalou o alcalde, necesitan un espazo axeitado para traballar xa que “por estar emprazadas onde están, ven como se limita a súa capacidade económica e, tamén, o seu potencial para xerar emprego”.
Unha vez que estea licitada a redacción do proxecto, estudarase a viabilidade dun acceso alternativo ao polígono que resulte o menos custoso posíbel ao mesmo tempo que estea garantida unha conexión coa área industrial nas mellores condicións. Buscase así que o acceso finalmente elixido non inflúa negativamente no prezo final do metro cadrado (a diferencia do que podería ocorrer co acceso fixado no PXOM). Unha vez completada a redacción o Concello comezará a traballar cos propietarios de Nebra para a compra dos terreos.
