O Concello de Boiro celebra o vindeiro venres 9 de febreiro o Xantar de Confraternidade da Terceira Idade, unha cita anual para as persoas xubiladas maiores de 65 anos cuxo prazo de inscrición abre este martes 30 de xaneiro e estará aberto ata o martes 6 de febreiro.
Como noutras ocasións o cátering, que está previsto para unhas 500 persoas, contará con música e baile. “Este xantar é unha das citas máis especiais do ano e ten como obxectivo ofrecer unha alternativa de ocio e confraternidade aos nosos maiores”, afirmou o alcalde, José Ramón Romero.
O prezo da comida será de 25 euros e poderanse inscribir no mesmo prazo as persoas empadroadas e non empadroadas maiores de 65 anos ou que acrediten a condición de xubilación.
As inscricións serán entre o 30 de xaneiro e o 6 de febreiro de 10.00 a 12.00 horas. Deben formalizarse no departamento de Servizos Sociais (2º andar do Concello de Boiro) sempre previstos do DNI das persoas solicitantes. En canto ás inscricións haberá cambios con respecto a outros anos xa que se poderá efectuar o pago con tarxeta no momento da inscrición e tamén se poderá facer a reserva previa de mesa.
