O Concello de Boiro colabora co Club de Remo Cabo de Cruz na organización da XXI Regata Contra Reloxo que terá lugar este sábado 27 de xaneiro no peirao de Cabo de Cruz. O concelleiro de Deportes, Marcos Fajardo, e o presidente do club, Luís Piñeiro, presentaron a proba.
A regata realizarase na modalidade contra reloxo lineal na que van participar os equipos masculinos e femininos das categorías de absolutos e veteranos e tamén de base. Pola mañá terá lugar a regata das categorías base e veteranas, con saída ás 11.30 horas. Pola tarde terá lugar a competición das categorías absolutas ás 17.00 horas.
“A modalidade contra reloxo está a ter moita repercusión a nivel nacional e internacional xa que este ano participarán clubs de Benidorm e Valencia e tamén do Reino Unido”, afirmou o presidente do Club de Remo de Cabo de Cruz, Luis Piñeiro.
O concelleiro de Deportes, Marcos Fajardo, convidou á veciñanza a asistir este sábado ao peirao de Cabo de Cruz para presenciar esta regata de traiñeiras, “esta é a primeira das probas que este ano se disputan en Boiro e que concluirán ao final do verán coa regata ACT”.
