Este xoves 18 celebrouse o pleno da Mancomunidade de Municipios Barbanza-Arousa (formado polos Concellos de Ribeira, A Pobra do Caramiñal, Boiro e Rianxo) na sala de xuntas do Concello de Boiro. O pleno saldouse co cambio de presidencia e traspaso de poderes, dentro da súa orde do día. Este cambio prodúcese de forma anual e, para o ano 2024 é a quenda de Luís Pérez Barral, alcalde de Ribeira, que colle a remuda de José Ramón Romero, alcalde de Boiro, e estréase como presidente da entidade.
Durante a sesión, ambos os alcaldes (o presidente saínte e o entrante) destacaron “a boa sintonía e colaboración que existe entre os catro Concellos da Mancomunidade para levar a cabo a estratexia do destino turístico”. Tamén destacaron que “esta estratexia seguirá a liña que xa se viña traballando, baseada na ría de Arousa e a serra do Barbanza como eixes diferenciadores e co Camiño de Santiago por terra e por mar como produtos principais”.
Os alcaldes engadiron que este ano abórdase a execución do Plan de Sustentabilidade Turística dotado con 1,5 millóns de euros, “o que supoñerá un antes e un despois para o territorio, e o financiamento concedido para Destinos Turísticos Intelixentes”. A achega dos fondos Next Generation ao ecosistema turístico da comarca, sinalaron, “suporá a posta en valor da enogastronomía local e tamén da súa historia pesqueira, de salgadura, conserveira e vinícola que forxou unha identidade propia do destino”.
Destacaron asemade actuacións como a creación do Museo da Conserva e da Salgadura, a inmersión no barrio dos Cataláns da Pobra así como experiencias no traballo nas adegas e conserveiras actuais e a degustación de produtos de primeira calidade que buscan xerar a emoción no visitante.
Continuarase, así mesmo, potenciando a colaboración público-privada e o traballo co sector, continuando este ano a implantación do selo de calidade turística SICTED.
A primeira gran cita deste ano será a presenza de Barbanza Arousa en FITUR a vindeira semana.
