A segunda tenente de alcalde e concelleira de Política Social de Rianxo, Ana Vidal, debullou a semana pasada, ante os medios de comunicación, as diferentes axudas que se convocaron dende o Concello para as familias traballadoras con fillos e fillas en idade escolar.
Segundo fixo saber deuse continuidade ás bolsas para material escolar, material e roupa deportiva e dispositivos electrónicos. Dentro das mesmas bases, houbo tres tipos de axudas: as de material escolar, cun importe máximo de 50€/alumno/a; achegas para material e roupa deportiva, cun importe de 75€/menor; e as axudas para dispositivos electrónicos, cubrindo o 75% da factura, ata un máximo de 300€ por alumno/a. Ademais, sinalou, convocáronse “por vez primeira en Rianxo” as bolsas para comedores escolares, e desta volta o importe da axuda ascendeu aos 200€ por cada alumno/a que desfrute deste servizo. “Ofertamos tamén as axudas para conciliación familiar, coas que cada familia recibe unha achega de 400€ por menor”, apuntou a concelleira, engadindo que a acollida das liñas de axuda “foi boa” e que, de feito, este curso resultou ser o que máis solicitudes rexistrou.
