O candidato socialista á presidencia da Xunta, José Ramón Gómez Besteiro, confirmou este domingo 14 de xaneiro que os socialistas galegos acompañarán á xente do mar na manifestación convocada o próximo 21 de xaneiro en Santiago en defensa do mar e en protesta pola xestión da crise dos granulados vertidos polo buque Toconao. Así o dixo durante unha visita a Carnota, onde mantivo unha xuntanza coa Confraría de Pescadores de Lira.
O responsábel socialista avogou por “unha Galicia “limpa da contaminación das mentiras” e dixo que o PSdeG é “o primeiro partido en confirmar a súa asistencia á manifestación do próximo domingo”. Besteiro confirmou que o partido vaise “sumar e apoiar” esta mobilización “xunto cos pescadores, mariscadoras, biólogos, ecoloxistas e voluntarios”.
Gómez Besteiro criticou a xestión do goberno galego aludindo ao último bandazo coa xestión da marea plástica, “logo de que a conselleira de Medio Ambiente anunciara este sábado unha comisión para analizar a toxicidade dos pélets logo de semanas negando a súa toxicidade”, dixo na Confraría de Pescadores de Lira, facendo un chamamento á Xunta a colaborar co Estado nun momento de crise no que “a suma das administracións é extraordinariamente importante”. Anunciou que os socialistas galegos farán “seguimento” do cumprimento de “tódalas administracións” nas tarefas de limpeza “para poñer fin á marea plástica”.
Besteiro tamén visitou á praia de Portocubelo, en Lira, xunto cos representantes do sector do mar da zona, aos que acompañaron membros da candidatura e os alcaldes e alcaldesas socialistas da Costa da Morte, ademais de representantes políticos do PSdeG.
Besteiro visitou Carnota acompañado do alcalde da localidade, Juan Manuel Saborido, e xunto coas alcaldesas e alcaldes de Camariñas -Sandra Ínsua-, Cee -Margot Lamela-, Dumbría -Raúl González-, e Vimianzo -Mónica Rodríguez-.
O alcalde de Carnota, Juan Manuel Saborido, coincidiu co candidato socialista e salientou “a importancia fundamental da cadea do mar para a economía galega e sobre todo para as localidades costeiras”. Criticou a estratexia do Goberno galego e subliñou que “non imos a ser nós os que estraguemos este entorno”, que no caso de Lira é Lugar de Interese Comunitario e Rede Natura 2000, por “unha simple campaña electoral”.
