Arousa Neo comezou o ano con forza. Concretamente, organizando as Trail Series 2024, que veñen na presente edición en tres quendas, a primeira das cales celébrase en Porto do Son. Para ir quecendo motores, confraternizando e afianzando vencellos entre deportistas, este sábado 20 de xaneiro Arousa Neo celebra a Quedada Trail da Ponte, na parroquia sonense de Xuño a partir das 16.00 horas. Serán 15 quilómetros de percorrida con máis de 650 metros de subida. Non se precisan inscricións. O punto de partida será o Camping Fraga Balada.
A quedada será a previa da Trail Serie 2024 que se celebra o 28 de xaneiro en Porto do Son.
As Trail Series 2024, que veñen este ano cun trazado renovado co obxectivo de seguir reivindicando a nosa comarca como escenario de primeira categoría para correr ou camiñar montañas, trasladaranos (logo de Porto do Son) a Outes (o Trail de Outes, o 17 de marzo) e logo á Pobra do Caramiñal (o 26 de maio co Trail de San Isidro). Para as tres probas Arousa Neo contará co apoio e colaboración dos ditos Concellos.
Respecto da primeira parada, a de Porto do Son, a do 28 de xaneiro, terá saída na parroquia de Xuño e a partir de aí as e os participantes percorrerán “unha zona completamente nova do territorio sonense”, chegando até a contorna da espectacular fervenza da Madanela e subindo logo ao Monte Graiade. Así nos explican dende Arousa Neo o remate da xornada: “Para finalizar, á chegada agárdanos todo un agasallo para os sentidos: o mar, a praia, a ponte, o río, as sendas e os camiños verdadeiramente únicos”.
As inscricións están abertas até este 22 de xaneiro en www.trailseries.run. A saída será o 28 de xaneiro ás 10.30 horas no Polideportivo CEIP Xuño. Haberá dous percorridos de 21K e de 15K, ademais de 3 avituallamentos na distancia longa e 2 na distancia curta (incluíndo o de meta).