O Consello da Xunta de Galicia aprobou este xoves 11 de xaneiro a declaración como proxecto industrial estratéxico da planta de manipulación e envasado de peixe (rodaballo e linguado) proxectada pola compañía internacional Stolt Sea Farm no polígono industrial de Rianxo (o Polígono do Te). A decisión adoptada foi valorada positivamente polo alcalde rianxeiro, Julián Bustelo, que explicou que esta declaración permite axilizar os prazos para a posta en funcionamento da nova factoría e, tamén, emendar unha serie de dificultades que viñan obstaculizando o desenvolvemento dun proxecto que contará cun investimento de 44,5 M€ e co cal a empresa prevé crear 173 postos de emprego directo.
Fontes do Concello engaden que o complexo industrial, que se implantará en seis parcelas adquiridas pola empresa, estará composto por unha edificación de dúas plantas para procesamento, un edificio auxiliar e outro para oficinas, cun total de 28.409,70 m² de superficie construída. Adicionalmente, executarase un edificio destinado a almacén loxístico con 6.372,04 m², ademais dun almacén auxiliar de 5.085,36 m².
