Unha persoa particular que se atopaba na zona botouse ao mar e socorreu ao condutor e único ocupante do vehículo, que non precisou asistencia sanitaria.
Segundo a información recibida no 112 Galicia, todo parece indicar que un despiste do condutor provocou que o coche caera ao mar.
Ás 19:20 horas desta tarde, os Bombeiros de Boiro informaban do suceso ao 112 Galicia. Indicaban que se desprazaran ata o peirao de Rianxo, a petición dun particular que vira como un coche caía ao mar.
Foron os mesmos Bombeiros os que comunicaron aos xestores de emerxencias que un particular se botara á auga para socorrer ao condutor, un octoxenario que resultara ileso e que a súa familia xa recollera.
No lugar tamén se atopaban os axentes da Policía Local e os efectivos da Agrupación de Voluntarios de Protección Civil de Rianxo. Os axentes indicaron que o coche estaba somerxido pero que agardarían a que baixara a marea para a súa retirada.
Desde o 112 Galicia informouse dos feitos ao persoal de Salvamento e do Servizo de Garda Costas de Galicia.
