O Concello de Ribeira prepara unha gran celebración, nas rúas da cidade, para recibir ás Súas Maxestades de Oriente o vindeiro venres 5 de xaneiro. Ademais da tradicional Cabalgata de Reis (que comezará sobre as 18.00 horas con saída da rúa de Canarias e con recepción na praza de España con Belén vivinte), está prevista un completo acompañamento musical para amenizar a véspera do día de Reis, con O Folión do Zampón, o Grupo de Gaitas Os Castros de Ames, a Charanga BB+, O Séquito Capitán Nemo, A Charanga Caña Aquí, Os Repoludos e a Banda de Música de Ferrol. O Concello informou que tamén habilitará na praza de España un espazo de seguridade que funcione como punto de recollida de nenas e nenos perdidos (no escenario da dita praza).
