O documental Doxandeem, cazadores de sueños, producido por Goree Island, vaise proxectar en Ribeira logo da súa estrea mundial no Festival Panafricano de cine de Ouagadougou (FESPACO), en Burkina Faso, e logo de pasar por pantallas de Senegal, Francia e Alemaña. Agora, este vindeiro xoves 14 de decembro chegará ao Centro Cultural Lustres Rivas de Ribeira, ás 19,30 horas da tarde, coa arela de reflexionar sobre a migración e a súa complexidade. Logo da proxección haberá un debate coa participación dos mediadores de Ecos do Sur, Djibril Faye e Said Hamdad, mediadores e expertos en migracións. Este documental forma parte da programación cultural de outono 4×3 da Deputación de A Coruña e presentarase da man da ONGD Ecos Do Sur, que moderará os debates posteriores ás proxeccións.
Sobre o documental
En 2006 un mozo senegalés deixou a súa terra natal a bordo dun caiuco, para perseguir o soño dunha vida mellor. Acadou as costas europeas con éxito, pero pronto decatouse da magnitude do cambio: a viaxe acababa de comezar. O verdadeiro desafío foi desenvolverse nunha terra estraña e chea de obstáculos. Mamadou Dia pasou no estado español nove anos, nos que escribiu un libro, 3052. Persiguiendo un sueño, no que plasmou a súa utopía de volver ao seu país e traballar para mudar as cousas. E así o fixo. En 2014 voltou, e xunto coa súa esposa, a ferrolá Laura Feal, foron materializando un espazo de creación, de pensamento e de desenvolvemento coa mocidade en Gandiol, a súa aldea natal no norte do país, que hoxe ten eco a nivel nacional e internacional.
O documentalista e músico senegalés, Saliou Waa Gendoum Sarr interesouse nesta historia “porque reflexa a complexidade das migracións, a maxia dos encontros”. Co seu ollar crítico e poético, Sarr acompaña a Mamadou pero tamén a Laura e outras persoas durante cinco anos nas súas pescudas máis profundas, indagando nas situacións complexas que derivan da mobilidade. “Doxandeem” é unha palabra en wolof que significa persoa errante, camiñante. A obra é un canto á liberdade de movemento e o descubrimento dunha África que se nos presenta lonxana, pero coa que estamos estreitamente ligados e na que se presentan propostas inspiradoras para o mundo global.
