O alcalde de Boiro, José Ramón Romero, e o presidente da Asociación Boirense de Empresarios (ABE), Daniel García Dosil, asinaron na mañá deste xoves 14 de decembro un convenio de colaboración para a promoción económica e comercial do municipio. A través deste acordo formalízase unha subvención á patronal que ascende aos 30.000 euros e cuxo obxectivo é levar a cabo actividades e propostas de dinamización comercial.
“A Asociación Boirense de Empresarios é a principal asociación de empresarios do concello e, durante todo o ano, realiza campañas que contribúen á dinamización comercial e económica do concello e do noso empresariado local”, afirmou o alcalde.
Ademais das campañas específicas que a ABE realiza ao longo do ano, conta con persoal administrativo e técnico dedicado ao asesoramento ao emprendemento e á actividade empresarial.
Este convenio de colaboración forma parte das accións que o Concello de Boiro leva a cabo en materia de promoción económica, do empresariado e emprendemento para fomentar o emprego no municipio.
