O Concello de Ribeira vai colaborar coa Universidade de Santiago (USC) a prol da pesca sustentábel, fomentando a nivel local e galego a actividade pesqueira con baixa pegada ecolóxica e respectuosa co medio ambiente e, facilitando a localización no mercado deste produtos sustentábeis. A presentación do proxecto levouse a cabo este venres 22 de decembro no Mercado Municipal de Ribeira. No acto estiveron presentes o vicerreitor de Transformación Dixital e Innovación, Gumersindo Feijóo, a técnica de Transferencia de Coñecemento, Lydia Fernández, o alcalde de Ribeira, Luís Pérez Barral, e os edís de Mercados e Sanidade e os patróns maiores de Ribeira e Aguiño. A iniciativa busca tamén incrementar o consumo de peixes e mariscos achegados ao mercado polo sector local, peixes e mariscos “que constitúen produtos da máxima calidade” (informou o alcalde) e que serán facilmente identificados grazas ás etiquetas de pesca sustentábel que vai achegar a USC a través deste proxecto. O patrón maior de Ribeira, José Antonio Pérez Sieira, salientou as vantaxes de participar nesta iniciativa da Universidade de Santiago: “Poderemos vender mellor os nosos produtos ao incrementarse os elementos de rastrexabilidade e de recoñecemento de orixe”.
