O Concello de Boiro celebra esta fin de semana a XIX exposición da Camelia sasanqua e outras, que está prevista para os días 16 e 17 de decembro no Pazo de Goiáns. A concelleira de Turismo, María Outeiral, presentou na mañá deste luns 11 de decembro o programa de actividades desta edición.
A exposición abrirá ao público o sábado ás 17.00 horas, logo do acto inaugural no que vai participar a Escola de Música de Boiro e no que se fará a plantación dunha camelia sasanqua na finca de Goiáns.
“Este ano participan expositores de todo Galicia cunha especial relevancia da nosa comarca que terá presenza con varios expositores durante a fin de semana”, afirmou a concelleira María Outeiral.
Está previsto que participen arredor de 27 expositores con máis de 50 metros de flor que se poderán visitar durante a fin de semana no Pazo de Goiáns. O horario de apertura da exposición será o sábado de 17.00 a 20.30 horas e o domingo de 11.00 a 14.00 horas e de 17.00 a 20.30 horas.
