O Concello da Pobra do Caramiñal enxalzou coa entrega do tradicional aguinaldo de Nadal o altruísmo do voluntariado que opera nos distintos ámbitos: benestar animal, a través da Protectora Moura; medioambiental; social; e da seguridade, representada no corpo da Protección Civil.
Fíxoo no salón de plenos do Consistorio coa entrega do tradicional agasallo de Nadal: un lote de produtos por persoa para desfrutar nestas datas.
No acto celebrado na tarde deste 13 de decembro participaron o alcalde, José Carlos Vidal; a concelleira dos Servizos Municipais, Estefanía Ramos; e a concelleira das Relacións Institucionais, Patricia Lojo.
Durante a súa intervención previa á entrega do aguinaldo, o rexedor gabou a implicación das máis de corenta persoas que exerceron neste ano como voluntarias, axudando á Administración local a acadar determinados obxectivos e sempre no beneficio do conxunto da sociedade.
