Proseguen unha semana máis as protestas da veciñanza de Dodro destinadas a cubrir a vacante do Centro de Saúde e frear os recortes locais en materia sanitaria, protestas tamén compartidas polo BNG e das que falamos hai uns días dende este medio.
Este luns 11 de decembro, sinalaron os afectados, “continúa sen cubrise o posto do andar superior do Centro de Saúde, avisando desde o centro co mesmo cartel das semanas pasadas, o que provoca que se deran citas para o próximo día 15 desde a semana pasada xa”. Esta circunstancia, recordaron, tradúcese nun só médico ao que lle resulta imposíbel atender en boas condicións a todo o municipio.
Xoán Bautista Mariño, responsábel local do BNG, dirixiuse ás persoas que este luns acudiron ao Centro de Saúde para animalas a continuar coas mobilizacións que iniciaron hai xa tres semanas tras comprobar que non se cubría a tempo completo a dita praza vacante.
O BNG, sinalou Mariño, “quere o mesmo que a poboación de Dodro: menos propaganda e máis atención”. E engadiu: “Sabemos que estanse presentando queixas e animamos a seguir cubrindo reclamacións ata que se solucione o problema de recortes que instalou o PP desde a Xunta e que agora se sinte, aínda máis directamente, desde o Centro de Saúde de Dodro”.
As persoas que hoxe se achegaron ao ambulatorio agradeceron a iniciativa nacionalista e coincidiron en que “hai que protestar cursando máis reclamacións para evitar a falta de persoal nun servizo primordial como a sanidade pública”.
O BNG anunciou que seguirá reclamando para a veciñanza melloras neste sector público e anuncia outras iniciativas fronte aos recortes “ata que se volva á normalidade que rompeu o SERGAS en Dodro”, sinalou Mariño.
