A CEMMA (Coordinadora para o Estudo dos Mamíferos Mariños) publicou estes días una guía de boas prácticas sobre a toniña, Phocoena phocoena, na que se inclúe o manexo da especies caso de que sexa observada no mar, varada na costa ou capturada nas faenas pesqueiras.
Esta publicación nace, en palabras da CEMMA, “co obxecto de contribuír á protección e conservación da toniña mediante a información sobre a especie e as súas ameazas a través da difusión, sensibilización, concienciación, educación ambiental e formación para o desenvolvemento de actitudes e aptitudes que causen impacto social e xeren unha atmosfera de respecto e admiración incidindo de maneira positiva na súa conservación”.
O libro, que conta cunha subvención da Deputación de Pontevedra, vén cun acceso aos audios, que é, segundo a coordinadora, “unha nova ferramenta versátil de traballo que tamén permite a total accesibilidade aos contidos para persoas con limitacións físicas que lle impidan ler as súas letras”.
Ademais inclúese o himno da toniña, gravado durante o proxecto Phocoe-nando coa colaboración do Concello de Nigrán, como contribución da cultura popular mariñeira á divulgación da conservación da especie mediante a adaptación da cantiga popular Sopra vento do norte.
Podemos consultar todos os materiais xerados no proxecto Phocoe-nando (varios idiomas) na web da CEMMA. A nova publicación está accesíbel en formato PDF.
