A Asociación Rianxeira de Empresarios (ARE) lanza nestas festas unha nova edición da súa Campaña de Nadal, e faino baixo o lema Este Nadal ti es a estrela. Compra en Rianxo. Trátase dunha iniciativa de dinamización comercial, económica, social e cultural dividida en dúas partes. Por unha banda a vertente presencial, coa ruleta da sorte repartindo agasallos, con actividades para a rapazada e cun gran sorteo final de vales de compra. E, por outra banda, a vertente en liña, con máis sorteos de vales de compra onde os clientes de tódolos socios da ARE poderán participar, con independencia do seu sector de actividade.
O valor total dos premios nesta campaña supera os 8.500 €.
Para participar, os clientes terán que conseguir os vales mercando nos negocios asociados que participan na campaña. Estes vales, ademais de dar opción a unha tirada na ruleta, no caso de non ser premiados ou non ser utilizados, dan dereito a participar no sorteo final da campaña.
Para asegurar que os premios sexan distribuídos de xeito equitativo e cheguen ao maior número de persoas posíbel, as tiradas na ruleta estarán limitadas a un máximo de 2 por persoa e por quenda.
Os premios que se repartirán na ruleta inclúen 250 mochilas, 250 botellas, 250 paraugas, 250 cuncas, 500 gorras, 1000 bolsas e deliciosas lambonadas. Amais, sortearanse 10 vales de compra de 50 € para gastar nos negocios participantes.
A campaña, segundo informa a ARE, xa está operativa.
