O Concello de Ribeira vén de adxudicar o proxecto de subministro e instalación das novas luminarias do carril bici do porto, concretamente na contorna da avenida do Malecón e a súa confluencia coa praza Heroínas de Sálvora e a entrada do porto pesqueiro. O orzamento de licitación ascende a 64.170,99 e executarase nun prazo de 20 días.
Segundo informa o Concello, esta actuación está encamiñada a “fomentar o uso seguro dos carrís bici existentes” e “a mellorar a visibilidade desta zona tan transitada; permitindo que condutores, peóns e ciclistas vexan claramente a contorna”. O reforzo lumínico consistirá en 4 columnas dotadas de 15 proxectores con ópticas LED.
Este proxecto está incluído dentro das actuacións EDUSI Máis Ribeira Atlántica 2020, co-financiado con fondos FEDER no marco do programa operativo de crecemento sustentábel 2014-2020.
“Unha iluminación axeitada crea un ambiente máis seguro e reconfortante para a veciñanza e para os visitantes” explicou o rexedor Luís Pérez, engadindo que “unha boa iluminación facilita a identificación de obstáculos, sinais de tráfico e cruces, reducindo así o risco de accidentes.”
