Os edís Francisco Suárez-Puerta e Genoveva Betanzos presentaron este luns 20 de novembro a axenda relacionada co alumeado de Nadal do Concello de Ribeira, que porá o foco dunha maneira especial en dinamizar o comercio local. Segundo confirmaron, o alumeado realizarase o venres 24 de novembro ás 18.30 na praza do Concello e estará amenizado por un concerto de Leite con Galletas.
Amais, “co propósito de dinamizar o comercio local neste Black Friday” celebrarase unha chocolatada tamén na praza do Concello ás 19 horas.
Posteriormente inaugurarase o Belén do Malecón, no que estivo traballando o alumnado de carpintería da UAD durante as últimas semanas, tamén amenizado pola charaganga BB+, que se desprazará polas rúas de Ribeira “co propósito de animar á veciñanza a consumir nos establecementos da cidade e do concello”, segundo explicou o concelleiro Suárez-Puerta, que tamén destacou que este ano, “como novidade”, instalarase unha gran coroa de 6 metros na praza do Concello, unha campá xigante de 9 metros no Malecón, unha pirámide na praza de España, e outros elementos decorativos como photocalls.
O día 1, ademais, procederase o alumeado en tódalas parroquias, onde se instalarán árbores naturais nas distintas igrexas e capelas decoradas; así como teitos luminoso e outros elementos decorativos para tódalas rúas.
