O Concello de Boiro leva semanas poñendo o foco na igualdade, no feminismo e na loita contra as agresións, a través do programa de charlas, talleres e relatorios Muller e Saúde. Sen ir máis lonxe, este 15 de novembro organiza o obradoiro Que é a violencia de xénero, como detectala e como erradicala? Será este 15 de novembro ás 18.00 horas, no Centro Social de Boiro.
Ao abeiro do dito programa, o vindeiro mércores 22 de novembro, en horario de tarde (de 17.00 a 20.00 horas), celebrarase un taller sobre Manexo de estrés e ansiedade. Será, tamén, no Centro Social.
Ademais, Boiro participa na campaña De Fronte contra a violencia de xénero, da Deputación da Coruña, xunto outros concellos da nosa comarca, como por exemplo Outes, A Pobra do Caramiñal e Ribeira. A campaña De Fronte inclúe este ano unha xira polos concellos que pon o foco na mocidade, achegándolle obradoiros para identificar e combater as violencias machistas en contextos de lecer e ocio nocturno. Destes obradoiros sairán varias micro pezas dixitais en formato stop motion que a área de Igualdade da Deputación irá pendurando na Rede. O obradoiro de Boiro foi o 11 de novembro e contou coa colaboración do colectivo local Turbina.
