Porto do Son vai celebrar un variado feixe de actividades con motivo do 25N, Día Internacional contra a Violencia de Xénero. O programa, do que falamos este mércores ao completo neste medio, terá unha marcada vertente deportiva, a través dun lema que se estende a todos os ámbitos deportivos e escolares do termo municipal: O deporte din NON á violencia de xénero. Esta será a base das actividades previstas para o sábado 25 no Complexo Deportivo da Piscina Municipal de Porto do Son, que prepara unha programación especial. Haberá cursos de balde de Aquagym (en dúas quendas dependendo da intensidade: de 10.00 a 10.45 horas -intensidade alta- e de 11.00 a 11.45 horas -intensidade baixa, media-) e de Aquacircuit (de 12.00 a 12.45 horas, intensidade alta) abertos a toda a veciñanza. As inscricións están abertas até o 22 de novembro na recepción da Piscina ou chamando ao 604 051 189. Trátase dunha actividade gratuíta para persoas abonadas e non abonadas. Haberá prazas limitadas. Organizan o Concello e a Escola de Natación.
