Un particular contactou co 112 Galicia pasadas cara as 9:15 horas desta mañá, alertado sobre un home que caera ao mar na zona da Gralleira, en Caamaño. Aínda que conseguira subir de novo ás rochas, estaba ferido e precisaba ser rescatado.
Nada máis recibir o aviso, o 112 Galicia solicitou a colaboración de Urxencias Sanitarias de Galicia-061, de Salvamento Marítimo, do Servizo de Gardacostas de Galicia, dos Bombeiros de Boiro, do GES de Noia, da Garda Civil, da Policía Local e dos voluntarios de Protección Civil de Porto do Son.
Finalmente, e tras valorar un posible rescate por aire, os servizos de emerxencias conseguiron trasladalo nunha padiola ata o lugar no que esperaba a ambulancia, na que foi evacuado ao Hospital do Barbanza.
