O parque infantil da praza de Galicia de Boiro xa conta cunha randeeira (columpio) inclusiva. Foi nstalada polo Concello de Boiro respondendo a unha petición das familias do municipio que frecuentan este lugar de lecer para as crianzas da zona. Estamos a falar dun brinquedo adaptado e de integración encamiñado a rapaces e rapazas con mobilidade reducida con arnés de protección. “É un elemento pensado especialmente para os nenos e nenas con algún tipo de discapacidade polo que rogamos que se faga un uso responsábel do mesmo”, afirmou a concelleira delegada dos parques infantís, Olga González.
O parque da Praza de Galicia é un dos máis empregados do municipio durante todo o ano, especialmente dende que se realizou a cuberta. “Pouco a pouco queremos seguir mellorando e renovando os parques infantís do municipio, adaptándoos ás necesidades dos nosos nenos e nenas”, recoñeceu a concelleira.
