O Concello de Boiro arranca o inicio do Nadal co tradicional acendido de luces, que está previsto para o vindeiro martes 5 de decembro de 2023. Nesta semana abre tamén o prazo de preinscrición do Campamento de Conciliación de Nadal. O alcalde, José Ramón Romero, e a concelleira de Cultura, María Outeiral, falaron máis polo miúdo das actividades.
O día 5 de decembro comezarán de maneira oficial as actividades do Nadal cun espectáculo itinerante de rúa a partir das 18.00 horas. Ás 19.00 horas a praza de Galicia acollerá a cerimonia do prendido na compaña de Asociación ASANOG e ao remate haberá peche musical coa Escola de Música de Boiro e Déborah Silva. “O acendido das luces é un día máxico para pequenos e maiores porque marca o inicio das actividades de Nadal. Este ano facémolo nun día laborábel para fomentar as compras e o comercio local”, recoñeceu o alcalde.
Entre as actividades do Nadal para este 2023 está tamén o Campamento de Conciliación que se vai celebrar entre o 22 de decembro e o 5 de xaneiro para nenos e nenas escolarizados de entre 3 e 12 anos. “Coas vacacións moitas familias teñen dificultades para conciliar a vida laboral e familiar, por iso sempre facemos esta proposta durante o tempo de lecer e posibilitar que os nenos e nenas conten cunha alternativa lúdica”, afirmou a concelleira, María Outeiral.
As preinscricións para o campamento abren este mércores día 29 e poderanse facer ata o 11 de decembro mediante o Rexistro Xeral ou sede electrónica do Concello de Boiro. Toda a información sobre o campamento e as solicitudes está dispoñibel na Casa da Cultura de Boiro ou na web municipal.
