O Goberno municipal de Outes compartiu un comunicado no que reflicte a súa preocupación polo mantemento do servizo de pediatría no Centro de Saúde, inquietude que derivou nunha petición expresa, enviada á Área Sanitaria de Santiago, para que garanta a continuidade do servizo.
No escrito o Concello amosa a súa “desconformidade” polo recorte no servizo de pediatría imposto pola Xunta de Galicia no Centro de Saúde: “Até o de agora”, explica o Goberno local, “Outes contaba cunha praza de pediatría en exclusiva, para atender aos máis de 500 menores de 16 anos que residen no municipio; porén, na última oferta de prazas, o SERGAS decidiu eliminar esa praza e ofertar unha compartida con Noia”. Desa maneira, engade o Executivo, a profesional que finalmente accedeu á praza, atende de 8.30 h a 11.30 h en Outes e logo desprázase ao Centro de Saúde noiés.
A petición ten o seu precedente directo na reunión mantida o martes pasado cos responsábeis do SERGAS e con facultativos do centro, na que participou o alcalde Manolo González, quen manifestou o “desacordo do Goberno municipal por esta circunstancia que obriga ás familias de Outes a desprazarse a Noia a partir desa hora”. E indicou: “Os problemas que poidan existir en Noia non poden solventarse a custa da calidade do servizo dos cidadáns de Outes”.
Dende o Goberno municipal consideran que o Centro de Saúde de Outes “leva anos sufrindo múltiples incidencias, tanto referidas a falta de substitutos dos profesionais e en particular no servizo de pediatría, o que resulta nun prexuízo continuo para as familias e para os profesionais do propio centro, que se ven na obriga de suplir as carencias existentes”. Por ese motivo, pediu aos responsábeis do SERGAS que “recapaciten e corrixan a decisión tomada o antes posíbel, evitando xerar máis malestar entre a cidadanía de Outes”.
