O alcalde de Boiro, José Ramón Romero, e o concelleiro de Urbanismo e Obras, Luís Ruiz, mantiveron unha xuntanza coa deputada de Obras da Deputación da Coruña, Mónica Rodríguez, para a posta en común de proxectos en estradas de titularidade provincial. Un dos temas tratados na xuntanza foi a futura mellora da vía de Saltiño a Berres que une dúas estradas de titularidade provincial e que conta co compromiso da Deputación da Coruña para a súa execución. Trátase dunha estrada de 950 metros de lonxitude que vai mellorar as conexións entre Cabo de Cruz e Abanqueiro e desviar o tráfico pesado do núcleo urbano.
“Neste momento estamos a realizar os tramites previos precisos en canto á obtención das distintas autorizacións para a realización do proxecto”, afirmou o alcalde. A variante consiste na creación dunha plataforma con dous carrís de 3,5 metros, carril bici e sendas peonís a ambos marxes da estrada.
Na xuntanza revisáronse tamén os puntos máis conflitivos das vías provinciais co obxectivo de traballar en actuacións que melloren a seguridade viaria; así como a revisión do estado do pavimento en vías provinciais para incluír no Plan de Conservación de Vías que a Deputación da Coruña leva a cabo cada ano.
