O Concello de Boiro ten aberto o prazo para a instalación de terrazas de hostalaría na vía pública entre o 1 de novembro e o 15 de decembro. A solicitude debe realizarse mediante a sede electrónica e a documentación e todo a información está dispoñíbel para a súa consulta na web municipal.
Segundo regula a Ordenanza municipal de terrazas na vía publica, a instalación durante todo o ano debe solicitarse entre o 1 de novembro e o 15 de decembro; as solicitudes específicas para o período estival poden facerse no mesmo prazo ou entre o 1 de marzo e o 15 de abril; e as solicitudes para as datas de Semana Santa, ata 10 doas antes do período solicitado.
O Concello lembra que “as autorizacións teñen unha vixencia anual, polo que a solicitude para a renovación de autorización débese realizar cada ano e non se poderá instalar ningunha terraza que non estea debidamente solicitada”.
Do mesmo xeito, a instalación de terrazas na vía pública está suxeita a unhas normas reguladas na ordenanza municipal. Como norma xeral pecharán ás 00.00 horas agás nas noites do venres, sábado e domingo e vésperas de festivos, así como durante o período estival, que o horario de peche se amplía ata as 02.00 horas.
