O Concello de Boiro desenvolve durante o curso 2023-2024 unha nova edición do Obradoiro de Emprego medioambiental Torre Goiáns III – Boiro. O alcalde, José Ramón Romero, e o concelleiro de Formación e Emprego, Roberto Lojo, visitaron este venres 24 de novembro ao alumnado e profesorado no comezo das aulas.
Segundo explicaron, a formación está dividida en dúas especialidades con 10 alumnos/as en cada unha. Por unha banda, vaise impartir a especialidade de Instalación e mantemento de xardíns e zonas verdes e, por outro, Repoboacións forestais e tratamentos silvícolas.
O alumnado participante vaise formar de xeito teórico e tamén práctico con actuación a desenvolver en materia de prevención de incendios forestais nos montes Peón e do Sino, na zona verde dos castros de Neixón. Tamén levarán a cabo tarefas de conservación da zona verde do Pazo de Goiáns, de axardinamento das rotondas de acceso ao Polígono de Espiñeira, de axardinamento e mellora paisaxística do parque da Cachada e de acondicionamento do xardín da praza de Galicia.
O alumnado traballador recibe formación teórica e práctica e conta cun contrato de traballo para a formación e aprendizaxe a tempo completo, de 40 horas semanais, durante os 12 meses que dura o programa e en horario de 7.30 horas a 15.30 horas.
“Debemos diversificar os sectores produtivos e estamos vendo que o sector forestal ten moitísimas potencialidades na nosa comarca e que a formación neste eido serve para favorecer a empregabilidade na zona”, afirmou o alcalde.
O Obradoiro de Emprego medioambiental Torre Goiáns III – Boiro realizase mediante unha subvención de 531.046,20 euros da Consellería de Promoción do Emprego e Igualdade da Xunta de Galicia para a realización de obradoiros de emprego na comunidade autónoma.
