O Auditorio Municipal de Rianxo vai acoller este venres 24 de novembro, ás 21.00 horas, a representación da obra de William Shakespeare Noite de Reis ou o que queirades, en versión teatral do ribeirense Quico Cadaval e contando no elenco actoral coas e cos integrantes da Escola de Teatro de Narón.
A cita está organizada polo Concello en colaboración coa Deputación da Coruña. A entrada será de balde ata completar capacidade (con retirada de convites dende unha hora antes do comezo na billeteira do auditorio, máximo 2 por persoa). Trátase dunha peza para todos públicos de unha hora e media de duración, aproximadamente.
Sinopse
Na costa do reino de Iliria, Viola e Sebastián, irmáns xemelgos, acaban separados tras un naufraxio, crendo na morte un do outro. Viola farase pasar por un paxe de nome Cesario, na corte do Duque Orsino. A partires deste momento, desencadearanse unha serie de enredos, mentiras, identidades falsas e personaxes do máis extravagantes, que darán como resultado unha das comedias máis divertidas do dramaturgo inglés Shakespeare.
A Escola
A Escola de Teatro de Narón cumpre corenta anos e para celebralo prepararon unha nova versión de Noite de Reis tendo como base a adaptación de Quico Cadaval e con Celia González na dirección.
O elenco da peza está formado polo alumnado do Practicum da Escola de Formación de Actrices e Actores de Narón: Alexis Sequeiro, Carmen Caeiro, Elisardo da Cruz, Franki Muíño, José Piñeiro, Luís Pillado, Manuel López, Marcela Ceballos, Saínza Ruíz e Vicky Sas.
O espectáculo foi xa representado en Ribeira e A Pobra.
A Escola de Teatro de Narón comezou a súa andaina no curso 1981/1982, co obxectivo de “impulsar a formación teatral e a actividade escénica”. Cada curso desenvolve dous proxectos de actuación, a Escola Municipal de Formación de Actrices e Actores e os obradoiros municipais de teatro.
