O alcalde de Boiro, José Ramón Romero, e a concelleira de Cultura, María Outeiral, mantiveron esta mañá unha xuntanza coas deputadas Natividad González e Soledad Agra para presentarlles o programa cultural do Concello de Boiro e coñecer as posibles liñas de colaboración.
A concelleira, María Outeiral, presentoulle o programa anual de actividades que o Concello de Boiro leva a cabo no Pazo de Goiáns co obxectivo de dalo a coñecer e buscar liñas de colaboración entre as dúas administracións. “Este espazo supón unha gran oportunidade de presente e futuro para a dinamización cultural e turística de Boiro e de toda a comarca do Barbanza”, afirmou María Outeiral.
Visitas guiadas e teatralizadas, presentacións literarias, xornadas temáticas, actuacións de música tradicional ou proxectos singulares como a Romaría das Letras ou o Mes da Danza son algunhas das principais actividades que se levan a cabo durante o ano. “Goiáns é un contedor de cultura que atrae cada vez a máis público e que precisa de financiamento para poder levar a cabo actividades”, afirmou a concelleira.
