O Concello de Boiro, coa colaboración dos Concellos de Rianxo e A Pobra, impulsou un novo Programa Integrado de Emprego para o curso 2023-2024 no que se van a formar 100 mulleres desempregadas. O alcalde de Boiro, José Ramón Romero, acompañado dos alcaldes de Rianxo e A Pobra, Julián Bustelo e José Carlos Vidal, visitaron o Centro de Formación para coñecer ao persoal que vai levar a cabo o programa.
Segundo explicaron fontes do Goberno boirense, o programa está destinado a 100 mulleres da comarca inscritas como demandantes de emprego e, durante 12 meses nos que se vai desenvolver a iniciativa, van recibir formación específica e tamén xornadas formativas destinadas a mellorar as súas habilidades para mellorar a empregabilidade e a inserción laboral. “É a quinta edición deste Programa Integrado de Emprego que cada ano ten moi bos resultados de inserción. A integración agora dos Concellos de Rianxo e A Pobra vainos permitir chegar a máis persoas demandantes de emprego e fomentar a inserción laboral na comarca”, recoñeceu José Ramón Romero, alcalde boirense.
A formación que inclúe esta nova edición do programa consta de módulos formativos en Envasado, acondicionado e embalaxe de produtos alimentarios; Elaboración de pezas cárnicas; Sistemas e Procesos Loxísticos; Marketing online; Cociña, Atención ao Cliente; Restauración; Preparación de produtos do mar… entre outros.
Ademais da formación en módulos específicos, o programa inclúe outras accións tranversais como a formación para a mellora da empregabilidade, formación en habilidades sociolaborais, idiomas e novas tecnoloxías, prospección de ofertas, deseño de currículos… “A formación conta con módulos transversais para favorecer a procura activa de emprego e tamén formación específica nos sectores produtivos da zona para garantir a empregabilidade na comarca”, afirmou o alcalde.
Todas as persoas inscritas contarán cunha bolsa de asistencia de 10 euros por día e un módulo específico de prácticas en empresas do Barbanza. Para facilitar a conciliación vaise facer unha aposta polas novas tecnoloxías, adaptación horario e flexibilidade en función das necesidades das participantes.
Para participar neste programa as persoas interesadas deben inscribirse como demandantes de emprego na Oficina de Emprego e solicitar a asignación do código 930. Máis información sobre o programa nos enderezos electrónicos cesar.cortinas@boiro.gal e fatima.gomez@boiro.gal ou nos teléfonos 650 042 409 e 659 247 963.
