O Concello de Boiro vai desenvolver accións formativas dirixidas a mellorar a cualificación de persoas desempregadas no período 2023-2024. No mes de decembro comezaranse a impartir dous cursos AFD de nivel 2 nas especialidades de Cociña e Bar e Cafetería.
Segundo explicaron fontes do Consistorio, os obxectivos destas accións formativas son “mellorar a cualificación profesional das persoas traballadoras” e “fortalecer as competencias profesionais relacionadas cos requirimentos de produtividade e competitividade das empresas, as necesidade de adaptación aos cambios nos sectores produtivos e á inserción laboral”.
O certificado de Cociña, de 828 horas de duración, desenvolverase no Centro de Formación e Viveiro de Empresas de Espiñeira entre o 4 de decembro e o 30 de xullo de 2024. O certificado de profesionalidade de Servizos de Bar e Cafetería impartirase no Centro de Formación e Viveiro de Empresas entre o 18 de decembro e o 19 de xuño de 2024 cun total de 658 horas de duración.
As accións formativas están destinadas a persoas que conten con estudos de nivel ESO ou competencias clave nivel 2, así como persoas que conten co certificado de profesionalidade da mesma familia nivel 1 (hostalería). As persoas interesadas en participar deberán facelo a través do enderezo electrónico emprego@boiro.gal ou o teléfono 981 84 26 09.
