O Concello de Lousame, a través da páxina web de Emesports, abriu as inscricións para o Trail de Lousame que levará a cabo o próximo 31 de decembro. Para este ano, a organización convocou un total de seiscentas prazas, a metade para o percorrido longo, de 25 quilómetros, e a outra metade para o curto, de 14.
O responsable de Deportes, Germán Romero, describiu as características da proba: “O trail longo está dirixido a persoas cunha gran capacidade física. Son 25 quilómetros cun 80% do percorrido totalmente inédito. Os participantes gozarán dunha subida ao monte Muralla pola empinada ladeira de Lousame e tamén pasarán polas minas de San Finx e pola cima de Aguieira antes de regresar ao polideportivo Pilar Barreiro Senra, que será o punto de partida”.
Doutra banda, o percorrido curto está enfocado “a persoas que lles gusta o deporte e queren iniciarse no mundo do trail”. Ademais de ser máis curto, tamén presenta un desnivel de 750 metros menos. Haberá premios para os tres primeiros clasificados en cada modalidade, tanto na categoría feminina como masculina. Ademais, a organización outorgará distintivos especiais aos mellores atletas locais.
Como novidade nesta edición, está prevista unha degustación dunha gran paella para recuperar enerxías antes de Fin de Ano.
