O prendido das luces e máis a inauguración do belén municipal marcarán o inicio do Nadal na Pobra do Caramiñal neste 2 de decembro. O acto terá lugar na praza Alcalde Segundo Durán, ás 18.00 horas, cando se ilumine a árbore alí situada e os Xardíns de Valle-Inclán, que novamente aspiran a se converter nun dos puntos máis atractivos do municipio por estas datas.
Posteriormente, o público desprazarase á praza do Emigrante para contemplar o nacemento configurado para este ano, ademais de desfrutar da tradicional chocolatada.
A concelleira dos Servizos Municipais, Estefanía Ramos, xunto coa técnica municipal, Sara Sánchez, animou toda a veciñanza a participar nesta xornada que servirá para “lle dar a benvida oficial ao Nadal e, polo tanto, ás actividades impulsadas dende as distintas áreas para vivir esta época festiva”, sinalaron. No que respecta á decoración lumínica, a edil indica que o investimento da Administración local ascende aos 32.000 euros (tanto o das estradas coma as luces LED da alameda), mentres que a elaboración do belén se sitúa nos 4.000 euros. Durante a súa intervención, a edil tamén quixo valorar o traballo da brigada municipal, “que estivo inmersa nos preparativos durante as últimas semanas”. Destacou especialmente o labor de María Sanmartín, xardineira e artista encargada de cada ano dar unha nova perspectiva ao nacemento con elementos sorpresa nel.
