A Deputación da Coruña informou da licitación da segunda fase das obras de mellora da DP-1105. Fíxoo, concretamente, nove días despois de que o presidente da Deputación da Coruña, Valentín González Formoso, anunciara en Noia, na compaña do alcalde Santiago Freire, que a institución provincial continuaría coas obras de mellora da seguridade e renovación do pavimento da dita estrada provincial, que conecta os municipios de Noia, Lousame e Boiro.
As obras da segunda fase do proxecto acaban de saír a licitación pública na Plataforma de Contratación do Estado cun orzamento previsto de 923.074 euros.
Tras completar a renovación do firme da estrada nos primeiros 5,5 quilómetros, que atravesan o termo municipal de Noia, a Deputación da Coruña continuará agora os traballos de mellora ata o quilómetro 13 da dita vía, nos termos municipais de Lousame e Boiro.
Os traballos, informa a institución provincial, “suporán a renovación da plataforma da estrada mediante o estendido dunha capa de mestura bituminosa en quente de 5 cm de espesor”.
Inclúese tamén a roza das marxes, a apertura e limpeza das beiravías (arcéns) e cunetas, o pintado das marcas viarias, bordes e pasos de peóns e a renovación da sinalización horizontal.
Con esta nova actuación, a Deputación suma 1,5 millóns de euros de investimento para completar a mellora integral dunha estrada que Formoso definiu como “fundamental para a vertebración das comunicacións da comarca de Barbanza” e que rexistra un importante volume de tráfico diario.
