En honra á verdade, despois de catro décadas de gobernos na Xunta de Galicia, hai que afirmar claramente de que a vivenda non foi unha cuestión prioritaria nin tan sequera importante para os responsables do Goberno autonómico.
Hai escasas datas, saltou a noticia de varias persoas falecidas, tres delas menores de idade, polo incendio nun edificio “okupado” no centro da cidade olívica. Como todo hai que dicilo, as diferentes administracións son cómplices da traxedia por non poñer os medios necesarios para facilitarlles unhas solucións ou alternativas habitacionais como, por outra banda, esixe a lexislación actual.
A Xunta de Galicia, administración responsable e con competencias en materia de vivenda, non pode alegar sen despeitearse de que “non hai vivendas dispoñibles”. Perdoa!!!. Familias, en situación de exclusión social severa e vulnerables con menores ao seu cargo, teñen que vivir nunha chabola, debaixo dunha ponte, ou como “okupas” en Galicia?
Persoas, son persoas e morreron ou foron “asasinadas” pola desidia das administracións públicas. Pero, non pasa nada. Non foron ningún dos seus fillos. Foron fillos de familias vulnerables, pobres e sen apenas recursos. Mentres tanto os responsables da Xunta de Galicia e da maioría dos concellos continúan mirando para outro lado, obviando unha realidade que non vai con eles. D.E.P.
