O Goberno de Rianxo informou de que xa están dispoñíbeis en formato en liña as bases para a selección do alumnado e persoal docente do Obradoiro de Emprego Monte Noso, promovido polo Concello.
Dende o Consistorio explican que as persoas interesadas en participar deben estar inscritas na Oficina de Emprego e manifestar alí o seu interese en participar no obradoiro (códigos 320, 330, 340 e 370).
Como lembraremos, o Concello de Rianxo vén de recibir 398.284,65€ da Consellería de Promoción do Emprego e Igualdade para a posta o funcionamento deste novo obradoiro dual de emprego. Permitirá formar a 15 alumnos/as traballadores/as nas especialidades de repoboacións forestais e tratamentos silvícolas, así como en actividades auxiliares de conservación e mellora de montes. A formación práctica desenvolverase en terreos de diferentes comunidades de montes de Rianxo. Prevese que o obradoiro bote a andar a comezos de novembro e en vindeiras datas publicarase a convocatoria de selección do persoal de formación, así como a solicitude de alumnado.
Esta nova iniciativa de emprego únese á que focalizou a súa actividade no Pazo de Rianxiño, impulsada tamén dende o Concello, desta volta centrada en xardinaría e traballos de acondicionamento.
