Logo de que a semana pasada compareceran ante os Xulgados de Noia os representantes de Tungsten San Finx para ratificar unha denuncia contra Ecoloxistas en Acción por un acto de protesta simbólico realizado o pasado 5 de xullo, a xuíza instrutora acordou mediante un auto o sobresemento da causa e o arquivo das actuacións ao “non apreciar existencia de feito delitivo algún”.
Tanto a Plataforma comarcal contra as verteduras da mina de San Finx como Ecoloxistas en Acción insistiran desde un inicio que se trataba “dunha denuncia falsa e infundada con afán intimidatorio”, coa “que a mineira pretendía silenciar as protestas como parte dunha campaña de acoso xudicial”.
Ante as preguntas da xuíza e do avogado de Ecoloxistas, Juan Manuel López Rubio, o representante da empresa de San Finx tivo que acabar recoñecendo que “na acción de protesta non se producira ningún tipo de dano material” e que, por tanto, “non cabía reclamar indemnización algunha”. Mesmo así, a empresa negouse a retirar a denuncia como lle esixiu o letrado da defensa.
Como lembraremos, no acto simbólico realizado en xullo taponárase durante breves instantes o tubo a través do que a empresa realiza vertidos ilegais. Precisamente a raíz desta protesta e dos escritos remitidos a Augas de Galicia por ese colectivo e a Plataforma, iniciouse un procedemento sancionador que podería carrexar unha sanción de ata 300.000 euros á empresa, logo de comprobarse que os niveis de cadmio no río a poucos metros do tubo taponado superan 78 veces o máximo legal permitido.
Os colectivos lembran que “esta non é a primeira vez que Tungsten San Finx interpón denuncias falsas contra organizacións ecoloxistas, pois xa en 2017 tentara intimidar a outros colectivos ambientais que expuxeran irregularidades da empresa mineira”. Daquela, lembran dende a plataforma e dende Ecoloxistas en Acción, “as dilixencias foron arquivadas, igual que a denuncia presentada o ano pasado por outra empresa do mesmo grupo que controla a mina de Varilongo, en Santa Comba”.
