O alcalde de Boiro, José Ramón Romero, e o concelleiro de Urbanismo e Obras, Luis Ruiz, visitaron na mañá deste mércores 11 de outubro o Polígono Industrial de Espiñeira para coñecer o termo das obras de mellora da infraestrutura e alumeado. As actuacións executadas, explicaron, contan co financiamento da Consellería de Economía, Industria e Innovación mediante unha subvención destinada á habilitación e mellora dos parques empresariais de Galicia.
Por unha banda leváronse a cabo traballos para a mellora da infraestrutura viaria no interior do parque empresarial, para o que se realizou un pavimentado con formigón de 1.665 metros cadrados de beirarrúas. Unhas actuacións que ascenden a un importe de 77.951,52 euros e coas que se logra aumentar a seguridade viaria no Polígono Industrial.
As outras actuacións que se executaron son as de mellora da iluminación, un proxecto de 59.510,15 euros co que se substituíron as luminarias antigas do alumeado público por unhas de tipo LED co obxectivo de unificar a iluminación do Polígono e lograr unha maior eficiencia enerxética ademais de mellorar a visibilidade no parque empresarial.