A xornada celebrada en verán na que o persoal dos Servizos Sociais da Pobra do Caramiñal e dos ámbitos sanitario e educativo do concello participou nunha xornada formativa sobre saúde mental, vaise complementar agora con iniciativas dirixidas a toda a cidadanía, segundo explicou ante os medios, este xoves 19 de outubro, a concelleira dos Servizos Sociais, Amparo Cerecedo, xunto coa educadora familiar do Concello, Lidia Martínez, coa finalidade de “sensibilizar sobre un tema que atinxe toda a sociedade, especialmente cando de xeito global se tende máis ao individualismo e cando se deixa de lado o espírito de comunidade, polo cal se producen, en moitos casos, situacións de illamento social”.
A integradora social de Andaina Pro Saúde Mental, Tania Lavandeira, impartirá no 24 de outubro, ás 19.30 horas, a charla Falamos? Desmontando mitos sobre a conduta suicida. Transcorrerá no Auditorio do Museo Valle-Inclán ao abeiro do programa integral no ámbito rural para a mellora na detección e intervención en casos de risco de suicidio.
Doutra banda, a partir da próxima semana, a Biblioteca Municipal Victoriano García Martí contará cun punto de lectura permanente composto por títulos para tódalas idades que abordan a saúde mental.
